ਸੱਜਣਾ ਵੇ ਸੱਜਣਾ

ਸੱਜਣਾ ਵੇ ਸੱਜਣਾ - ਤੇਰੇ ਸ਼ਹਿਰ ਵਾਲੀ ਸਾਨੂੰ, ਕਿੰਨੀ ਸੋਹਣੀ ਲੱਗਦੀ ਦੁਪਹਿਰ,
ਫੇਰ ਵੀ ਪਤਾ ਨੀ ਕਾਹਤੋਂ, ਮੋਹ ਜਿਹਾ ਆਈ ਜਾਂਦੈ, ਭਾਵੇਂ ਸਾਡੇ ਭੁੱਜ ਗਏ ਨੇ ਪੈਰ, ..ਸੱਜਣਾ...................ਵੇ ਸੱਜਣਾ....ਵੇ ਸੱਜਣਾ

ਮਾਂ ਨੇ ਵੀ ਰੋਕਿਆ, ਬਾਪੂ ਨੇ ਵੀ ਰੋਕਿਆ, ਨਾ ਜਾਈਂ ਸੱਜਣਾਂ ਦੇ ਸ਼ਹਿਰ,
ਪਰ ਸਾਡੀ ਭੁੱਖ ਸਗੋਂ, ਦੂਣੀ ਚੌਣੀ ਹੋਈ ਜਾਵੇ, ਹੌਲ ਪੈਂਦੇ ਰਹਿਣ ਚੱਤੋ ਪਹਿਰ,....ਸੱਜਣਾ...................ਵੇ ਸੱਜਣਾ....ਵੇ ਸੱਜਣਾ


ਤੇਰੇ ਸ਼ਹਿਰ ਕਾਹਦੀ ਆਈ ਮਿੱਤਰਾ ਵੇ ਮੇਰਿਆ, ਭੁੱਲੇ ਸਭ ਸ਼ਿਕਵੇ ਤੇ ਵੈਰ,
ਚਿੱਤ ਕਰੇ ਤੱਤੇ ਤੱਤੇ ਰੇਤਿਆਂ ਨੂੰ ਚੁੰਮ ਲਵਾਂ, ਲੱਭ ਕਿਤੋਂ ਸੱਜਣਾਂ ਦੀ ਪੈੜ,.....ਸੱਜਣਾ...................ਵੇ ਸੱਜਣਾ....ਵੇ ਸੱਜਣਾ


ਤੇਰੇ ਸ਼ਹਿਰ ਵਿੱਚ ਸਭ ਆਪਣੇ ਹੀ ਵੱਸਦੇ ਨੇ, ਸਾਡੇ ਪਿੰਡ ਵੱਸਦੇ ਨੇ ਗੈਰ,
ਜਿੰਨੇ ਮਿਲੇ ਸਾਨੂੰ ਸਭ ਮਿਲੇ ਦੁੱਖ ਦੇਣ ਵਾਲੇ, ਇੱਕ ਨੇ ਨਾ ਪੁੱਛੀ ਸਾਡੀ ਖੈਰ,....ਸੱਜਣਾ...................ਵੇ ਸੱਜਣਾ....ਵੇ ਸੱਜਣਾ


ਤੇਰੇ ਸ਼ਹਿਰ ਵਿੱਚ ਅਸੀਂ ਮੰਗਤਿਆਂ ਬਰੋਬਰ, ਭਾਵੇਂ ਗੁੜ ਪਾਦੇ ਭਾਵੇਂ ਜ਼ਹਿਰ,
ਤੇਰੇ ਦਰ ਉੱਤੋਂ ਭੁੱਖ ਨੈਣਾਂ ਦੀ ਮਿਟਾਵਣੀ ਵੇ, ਇਹੋ ਸਾਡੇ ਫੱਕਰਾਂ ਦੀ ਖੈਰ,.....ਸੱਜਣਾ...................ਵੇ ਸੱਜਣਾ....ਵੇ ਸੱਜਣਾ


ਜੱਗ ਭਾਵੇਂ ਰੁੱਸ ਜਾਏ, ਰੱਬ ਭਾਵੇਂ ਰੁੱਸ ਜਾਏ, ਸਾਨੂੰ ਸਾਡੇ ਮਿੱਤਰਾਂ ਦੀ ਲੈਰ,
ਮਾਨਾ ਮਰਜਾਣਿਆ ਕੀ ਸ਼ਹਿਰ ਤੇਰਾ ਵੇਖਿਆ, ਸਾਥੋਂ ਭੁੱਲੀ ਜਾਂਦੀ ਨਾ ਦੁਪਹਿਰ,....ਸੱਜਣਾ...................ਵੇ ਸੱਜਣਾ....ਵੇ ਸੱਜਣਾ

                                                                                                                          :-  ਗੁਰਦਾਸ  ਮਾਨ